50

نبی کریم حضرت محمد ؐ کی سیرت ہمارے لئے مشعل راہ ،پاکستان کو ریاست مدینہ کے طرز پر ڈھالنے کا مقصد اپنے رہبر و پیغمبر کی صفات اور اسوہ حسنہ پر عمل درآمد کی کوشش ہے، وفاقی وزیرفواد چوہدری

اسلام آباد(نیوزمارٹ ڈیسک)وفاقی وزیر اطلاعات و نشریات چوہدری فواد حسین نے کہا ہے کہ نبی کریم حضرت محمدؐ کی سیرت ہمارے لئے مشعل راہ ہے، آپؐ کے اسوہ حسنہ پر عمل ہی دنیا و آخرت میں کامیابی کا ضامن ہے، آج پاکستان کو ریاست مدینہ کے طرز پر ڈھالنے کا مقصد اپنے رہبر و پیغمبر کی صفات اور اسوہ حسنہ پر عمل درآمد کی کوشش ہے۔انہوں نے 12 ربیع الاول یوم ولادت رسولؐ کے موقع پر اپنے پیغام میں کہا کہ ہماری کوشش ہے کہ ہم ریاست مدینہ کے تصور سے پوری طرح رہنمائی حاصل کر کے وطن عزیز کو ایک فلاحی ریاست کے سانچے میں ڈھالیں، اب منزل زیادہ دور نہیں، بہت جلد اس کے مثبت اثرات مرتب ہوں گے۔ وفاقی وزیر اطلاعات نے کہا کہ ہمیں اسوہ حسنہ سے رہنمائی لے کر معاشرے میں امن و بھائی چارے کے فروغ اور فلاح انسانیت کے لیے کام کرنا ہو گا۔ چوہدری فواد حسین نے کہا کہ خاتم النبینؐ کی حیات طیبہ نہ صرف مسلمانوں بلکہ تمام انسانیت کی سیرت و کردار کی تعمیر اور اخلاق و اعمال کی درستگی کی عمدہ مثال ہے۔ انہوں نے کہا کہ نبی کریمؐ کی تعلیمات پر عمل پیرا ہو کر ہمیں قومی، مذہبی اور اجتماعی مفادات کو سامنے رکھتے ہوئے اپنی سوچ اور رویوں میں تبدیلی لانا ہو گی۔ ان کا کہنا تھا کہ عصر حاضر کا تقاضا ہے کہ ہم عشق محمدﷺ کو اپنے کردار، گفتار اور عملی نمونہ سے دنیا پر ثابت کریں۔ انہوں نے دعا کی کہ ماہ ربیع الاول ہمارے لئے باعث رحمت و بخشش ہو اور اللہ تعالی ہمیں محسن انسانیت نبی کریمؐ کے اسوہ حسن پر عمل پیرا ہونے کی توفیق عطا فرمائے اور وطن عزیز کو حقیقی ترقی و خوشحالی کی راہ پر گامزن کرے۔

اس خبر پر اپنی رائے کا اظہار کریں

اپنا تبصرہ بھیجیں